Pagsisimula ng SEA Games torch relay itinuloy sa kabila ng aftershocks

ABS-CBN News

Posted at Oct 30 2019 07:58 PM | Updated as of Oct 30 2019 08:56 PM

Watch also in iWant or TFC.tv

Itinuloy pa rin ngayong Miyerkoles ang 2019 Southeast Asian (SEA) Games torch relay sa lungsod ng Davao sa kabila ng mga nararanasang aftershock kasunod ng magnitude 6.6 na lindol na tumama sa Mindanao.

Nasa higit 2,000 runner ang nakilahok sa 5 kilometrong torch relay, kasama ang SEA Games mascot na si Pami.

Nanguna ang 8 torch bearers, kabilang ng mga champion athletes na tubong-Davao, gold medalist sa AIBA Women's World Boxing Championships na si Nesthy Petecio, gold medalist sa Asian Sambo Championships 2019 na si Sydney Tancontian, at double bronze medalist sa wakeboarding sa 2015 SEA Games na si Mikee Selga.

Dumalo rin ang mga opisyal ng Philippine Southeast Asian Games Organizing Committee, Philippine Sports Commission, at Philippine Olympic Committee.

Guest of honor naman si Sen. Christopher "Bong" Go, Davao Vice Mayor Sebastian "Baste" Duterte, at aktor na si Robin Padilla.

Davao ang unang lokasyon ng SEA Games torch relay. Susunod naman ay sa Cebu sa Nobyembre 16.

Iikot din ang SEA Games torch sa Maynila at Clark Freeport hanggang sa opening ng SEA Games sa Philippine Arena sa Nobyembre 30.

-- Ulat ni Gretchen Fullido, ABS-CBN News

Bisitahin ang Patrol.PH para sa iba pang mga balita.