2 lalaki pinaulanan ng bala habang bumibili ng pintura sa Laguna

Dennis Datu, ABS-CBN News

Posted at Sep 21 2020 02:57 PM

BIÑAN CITY, Laguna — Patay ang 2 lalaki sa lungsod na ito noong Linggo matapos silang pagbabarilin ng mga hindi pa nakikilalang salarin.

Nangyari ang insidente sa Barangay Canlalay, habang bumibili ng pintura sa hardware store ang mga biktima, na kinilalang sina Lope Espejo, Jr. at Randy Avila.

Ayon sa imbestigasyon, sakay ng isang SUV na walang plaka ang nasa 3 hanggang 4 na gunmen. 

Sabi ni Patrolman Mikelle Cabrera, imbestigador sa Biñan police, nakasuot ng bonnet at mask ang mga salarin.

Batay daw sa ulat ng pulisya, si Espejo ay lider umano ng isang gun-for-hire group at dawit daw sa extortion sa mga vendor sa Biñan City Public Market. 

Patuloy ang imbestigasyon ng mga awtoridad sa krimen at kung ano ang motibo dito. 

Bisitahin ang Patrol.PH para sa iba pang mga balita.