Bulacan mayor nanawagan: Mag-ingat, sumunod sa health protocols kahit GCQ na

ABS-CBN News

Posted at Aug 19 2020 02:21 PM | Updated as of Aug 19 2020 07:47 PM

Watch more in iWantTFC

Nakiusap sa publiko si Mayor Arthur Robes ng San Jose del Monte, Bulacan na patuloy na mag-ingat at sumunod sa health protocols ngayong nagbalik na sa mas maluwag na general community quarantine ang lalawigan.

"Pakiusap ko sa taumbayan, kahit tayo ay nasa GCQ... kailangan mag-ingat pa rin tayo, mag-face mask tayo," ani Robes.

Bagaman maganda sa ekonomiya ang pagbabalik sa GCQ dahil balik-trabaho na ang maraming manggagawa, hindi umano mapakali si Robes sa dami ng naglalabasang tao.

"Kami mas gusto sana namin na MECQ (modified enhanced community quarantine) dahil mas mahigpit," ani Robes.

"The truth of the matter is, hindi pa tapos ang problema," dagdag niya.

Sa huling tala ng San Jose del Monte Public Information Office, 691 na ang kumpirmadong kaso ng COVID-19 sa lungsod habang 172 ang pinaghihinalaang nahawahan ng sakit.

Sa pagbabalik sa GCQ, muling nagbukas ngayong Miyerkoles ang ilang negosyo sa lungsod tulad ng mga parlor at tindahan ng tools.

Balik-pasada na rin ang ilang uri ng pampublikong transportasyon, gaya ng mga jeep, subalit bihira umano ang mga pasahero.

-- Ulat ni Jorge Cariño, ABS-CBN News

Bisitahin ang Patrol.PH para sa iba pang mga balita.