Sunog sumiklab sa Camp Olivas sa Pampanga

ABS-CBN News

Posted at Jul 09 2020 11:49 PM | Updated as of Jul 10 2020 03:33 AM

Watch more in iWant or TFC.tv

Gracie Rutao, ABS-CBN News

(UPDATE) Sumiklab ang sunog sa multipurpose hall ng Camp Olivas sa San Fernando, Pampanga Huwebes ng gabi.

Naapula ng mga bombero ang sunog lagpas alas 11 ng gabi, ayon sa Bureau of Fire Protection.

Ayon sa BFP, halos paubos na ang gusali nang datnan nila ito.

“Nasa gitna yung apoy at kasalukuyang naco-consume yung establishment. Almost mga 80 percent na. Opo malaki na,” ani San Fernando City fire marshall Insp. Christopher Lumiwes.

Swerteng ligtas na nakalabas ang 3 babaeng pulis na nakaduty sa loob ng gusali nang mangyari ang sunog na umabot sa ikalawang alarma.

Higit-kumulang P5 milyong halaga ng ari-arian ang nasira, ayon sa BFP.

Ayon sa tagapagsalita ng kampo, ito ang multipurpose hall kung saan isinasagawa ang "Rektang Konek, Aksyon Agad" na multimedia program ng PRO-3.

Ito ang dating PANA hall na ipinangalan sa dating regional director na si Police Chief Supt. Aaron Aquino.

Dekada 70 pa umano ang gusali na kalauna’y isinaayos bilang conference studio. - Ulat nina Gracie Rutao at Trisha Mostoles, ABS-CBN News

Bisitahin ang Patrol.PH para sa iba pang mga balita.