Mga UPCAT passer sa Antique, nakatanggap ng libreng cake

Jennifer Garcia Hernandez, ABS-CBN News

Posted at Jun 18 2020 11:07 PM

Laking tuwa ni Christine Garzon matapos siya makakuha ng libreng cake mula sa grupong UP Pandanon, na binubuo ng mga UP graduate at mga estudyante. Nakapasa si Garzon sa UPCAT at mag-aaral siya sa UP Visayas para sa kursong Bachelor of Science in Literature. Kuha ng UP Pandananon

Pitong passer ng University of the Philippines College Admission Test (UPCAT) sa Antique ang binigyan ng cake ng isang grupong binubuo ng mga UP graduate at mga estudyante nitong Huwebes.

Ayon sa isa sa mga passer na si Christine Garzon, hindi niya inasahan na makakatanggap siya ng sopresa mula sa UP Pandananon matapos siya makapasa sa naturang entrance exam. 

Hindi naging madali ang kaniyang dinaanan bago makakuha at maipasa ang exam, aniya. Kaya laking tuwa niya na kabilang siya sa mga nakapasa at mag-aaral sa UP Visayas para sa kursong Bachelor of Science in Literature.

Ayon naman kay Arden Rod Condez na isa sa mga miyembro ng UP Pandananon, nararapat lang na bigyang pansin ang mga UPCAT passer sa kanilang bayan dahil hindi madali ang exam at makapasok sa UP. 

Plano nila ngayon maglunsad ng fundraising para makabili ng laptop na maaaring gamitin ng mga UPCAT passer sa kanilang pagpasok sa kolehiyo.

Bisitahin ang Patrol.PH para sa iba pang mga balita.