Takbo ng MRT-3 pabibilisin sa 50 kilometro kada oras simula Nov. 3

Jacque Manabat, ABS-CBN News

Posted at Oct 29 2020 03:53 PM | Updated as of Oct 29 2020 06:54 PM

Sinubukan ng pamunuan ng MRT na bilisan ang takbo ng tren sa 50 kilometro kada oras (kph) mula sa 40 kph. Jacque Manabat, ABS-CBN News

MAYNILA - Nagsagawa ng test run ang MRT-3 ng kanilang mga tren bago isara ang operasyon ng riles mula Oktubre 31 hanggang Nobyembre 2 para sa maintenance operations. 

Ito ay para magbigay daan sa planong pabilisin ang takbo ng tren sa 50 kilometro kada oras mula sa 40kph oras na magbalik-operasyon ang tren sa Nobyembre 3. 

Sa pagpapabilis ng takbo ng tren, inaasahang magiging 1 oras at 5 minuto na ang biyahe, mula sa dating 1 oras at 10 minuto at iikli ang pila papasok ng istasyon.  

Watch more in iWantTFC

"Kaya nga may mga simulation bago i-implement para macheck natin kung may techincal issues pa so far wala kami nakukuha… Kaya di namin kami bibiglain na pagdating sa November 3 na 50 kaagad… Kailangan yung driver mo makapag-adjust din sa speed," ani Mike Capati, MRT-3 Director for Operations. 

Mababawasan na rin anila ang sira sa tren dahil maayos na ang tatakbuhan nito; at kapag maayos na ang riles, mababawasan na rin ang aberya sa biyahe kahit pa pabilisin ang takbo ng tren. 

Watch more in iWantTFC

Nasa 70,000 na raw ang dami ng mga sumasakay sa MRT-3 kada araw mula sa dating higit 300,000 bago pa magkaroon ng coronavirus disease (COVID-19) pandemic. 

Huling bumiyahe ng 60 kilometro kada oras ang tren noong Setyembre 2014 nang sumadsad ang isang tren nito sa MRT-3 Taft Station. 
 

Bisitahin ang Patrol.PH para sa iba pang mga balita.