Meralco naglabas ng guidelines sa pagkuha ng refund sa estimated blills

Alvin Elchico, ABS-CBN News

Posted at Jul 13 2020 04:12 PM | Updated as of Jul 13 2020 07:15 PM

Watch more in iWant or TFC.tv

Inilabas ngayong Lunes ng Meralco ang guidelines o alituntunin sa pagkuha ng refund sa binayaran ng mga kostumer na estimated bill noong lockdown.

Magugunitang noong nakaraang linggo ay iniutos ng Energy Regulatory Commission sa distribution utilities na ibalik ang nasingil na "estimated bills" noong mga nakalipas na buwan.

Kung hanggang P10,000 ang refund, cash itong ibibigay samantalang tseke naman kapag lagpas sa naturang halaga.

Sa mga gustong mag-refund, kailangan magdala ng ID at pruweba ng binayaran, tulad ng resibo.

Kung nakapangalan sa iba ang bill, kailangan ng authorization galing sa may-ari.

Kung patay na ang nakapangalan sa bill, kailangang magpakita ng patunay na kamag-anak ang kumukuha ng refund.

"Pera 'yan eh so kailangan maingat kami... kasi mahirap 'yong tinatawag natin na mapunta ang pera sa hindi tamang tao," ani Meralco Spokesperson Joe Zaldarriaga.

Sa mga nagbayad naman gamit ang credit card o automatic debit o app, kailangan munang tumawag sa 16211 o makipag-ugnayan sa social media accounts ng Meralco.

Bisitahin ang Patrol.PH para sa iba pang mga balita.