Utos na refund sa siningil na 'estimated bills' inilabas na

ABS-CBN News

Posted at Jul 09 2020 07:25 PM | Updated as of Jul 09 2020 08:07 PM

MAYNILA — Naiinis ang manikuristang si Vilma Pasamba dahil matapos niyang bayaran ang Meralco mula Marso hanggang Mayo, katumbas pa rin ng 3 bayaran ang nakuha niyang June bill.

"Bayad ko na po ang 4 na buwan eh... pero hindi ko matanggap kung bakit ganito ang bill ko," aniya. 

Isa si Pasamba sa mga kuwalipikado sa refund ng Meralco.

Inilabas ngayong Huwebes ng Energy Regulatory Commission ang utos na refund, na sakop ang Meralco at iba pang distribution utilities na naningil ng "estimated bills" noong mga nakalipas na buwan.

Kabilang sa mga pinababalik sa mga konsumer ang siningil na ilang charges na pinatigil na ng komisyon.

Sa kaso ng Meralco, nasa higit 4.5 milyon na kostumer ang nagkaroon ng kalituhan dahil sa May billing.

"Paumanhin sa mga customer na naguluhan sa kanilang May bills," ani Meralco Spokesperson Joe Zaldarriaga.

"Lilinawin lang individually kung ano ang kanilang batayan ng bill, ano 'yong reading noong Mayo," paliwanag ni Zaldarriaga.

Dahil aminado ang Meralco sa pagkukulang, pinawi nila ang pangamba ng kostumer na baka maputulan kapag hindi nakabayad.

"Between now and the end of September there will be no disconnection whatsoever," ani Zaldarriaga.

Samantala, isinusulong ng ERC sa Kongreso na gawan ng batas para magamit ang mga "unclaimed refund" sa kaso ng income tax at meter deposit nitong nakaraang taon, na umaabot sa P2.5 milyon.

Nakatengga lang ang pera sa Meralco habang hinihintay ang desisyon ng gobyerno.

-- Ulat ni Alvin Elchico, ABS-CBN News

Bisitahin ang Patrol.PH para sa iba pang mga balita.