400 Pinoy nurse kailangan sa Germany, sweldo higit P100,000 kada buwan

ABS-CBN News

Posted at Jan 06 2019 11:41 AM

Dumalo sa isang sendoff sa Times Plaza, Manila ang ilang nurse na magtatrabaho sa Germany, Hunyo 7, 2018. George Calvelo, ABS CBN News

MANILA - Tumatanggap na ang Philippine Overseas Employment Administration ng mga aplikasyon para sa 400 nurse na kailangan sa Germany.

Tatanggapin ang mga aplikante sa ilalim ng Triple Win Project, isang joint initiative ng German Federal Employment Agency at ng POEA na layuning makapagpadala ng mga nursing professional sa iba’t ibang panig ng Germany.

Tatanggap ang mga makukuhang aplikante ng ng panimulang buwanang suweldo na €1,900 (P113,000) na tataas pa sa € 2,300 (P137,000) matapos kilalanin bilang qualified nurse, sabi ng POEA.

Ang mga kuwalipikadong aplikante ay dapat anilang Filipino citizen, lalaki o babae, at permanenteng residente ng Pilipinas na mayroong Bachelor of Science in Nursing, may aktibong Philippine Nursing License at may 2 taon na professional bedside experience sa mga ospital, rehabilitation center o care institution.

Dagdag ng POEA, ang aplikante ay dapat mayroon ding German language proficiency o handang sumailalim sa language training sa Pilipinas na babayaran ng employer upang magkaroon ng Level B1 proficiency.

Kailangan din nilang dumalo sa mga language class sa Abril at Mayo 2019; o may Bl or B2 Language Proficiency Level alinsunod sa Common European Framework of Reference for Languages.

Dapat magparehistro ang mga aplikante sa www.eservices.poea.gov.ph at personal na magsumite ng mga kinakailangang dokumento sa Manpower Registry Division, Blas F. Ople Building sa Mandaluyong, ayon sa POEA.

Kailangan anilang i-fasten sa isang folder ang mga documentary requirement tulad ng:

- Cover letter at curriculum vitae na mayroong colored passport size picture
- High School Diploma (notarized copy)
- Nursing Diploma (notarized copy)
- Board Certificate at kopya ng lisensya mula sa Professional Regulation Commission
- Certificate of employment in related field (previous and current, notarized copy)
- Attendance at/o level certificate sa German language, kung mayroon
- Kopya ng valid passport
- Certificate ng POEA online Pre-employment Orientation Seminar

Kailangang ipakita ang mga orihinal na dokumento para sa authentication ng mga impormasyon bago ito ipadala sa employer, sabi ng POEA.

Ang deadline para sa pagsusumite ng aplikasyon sa POEA Central at Regional Offices ay sa Pebrero 28.

Magsasagawa naman ng interview ang mga employer sa pagtatapos ng Marso.

Bisitahin ang Patrol.PH para sa iba pang mga balita.