Bata nabiktima ng 'Dugo-dugo' gang

Jekki Pascual, ABS-CBN News

Posted at Dec 09 2017 09:59 AM

MANILA - Halos kalahating milyong pisong cash at alahas ang natangay ng hinihinalang miyembro ng Dugo-dugo gang mula sa isang bata na residente ng Quezon City nang lokohin itong naospital ang ina at kailangan ng pera. 

Ayon sa blotter ng pulisya, tinawagan ng 'di pa kilalang tao ang 15-anyos na anak ng isang ginang sa Doña Carmen Subdivision sa Barangay Commonwealth.

Sinabihan ang anak na naaksidente ang nanay nito at kailangan ng malaking halaga ng pera para sa ospital.

Inutusan ang bata na kumuha ng pera at alahas at nagkita sila sa isang mall sa Sucat, Parañaque. Huli na nang malaman ng bata na hindi naaksidente ang ina.

Naibigay niya ang P100,000 cash, alahas na aabot sa P60,000 ang halaga at tatlong relo na nagkakahalaga ng P300,000.

Ayon sa pulis, matagal na ang ganitong modus pero marami pa rin ang nabibiktima.

Payo nila, huwag i-post lahat ng personal na impormasyon sa social media dahil dito nalalaman ng mga suspek ang mga detalye tungkol sa kanilang target.

Bisitahin ang Patrol.PH para sa iba pang mga balita.