700 kabataan, magulang nagmartsa vs bullying, iba pang pang-aabuso

ABS-CBN News

Posted at Nov 24 2018 09:24 PM

Nasa 700 kabataan at mga magulang ang nagmartsa sa advocacy walk sa pagdiwang ng National Children's Month sa Maynila nitong Sabado.

Sa advocacy walk na inorganisa ng Kaibigan Ermita Outreach Foundation Incorporated (KEOFI), layon nilang labanan ang pang-aabuso, bullying, at teenage pregnancy.

Aabot sa 2.5 kilometro ang minartsa ng mga lumahok mula Sta. Ana, San Andres Bukid at Tondo, Maynila para isigaw ang kanilang adhikain.

Hindi laruan kung hindi mga karatula ang hawak ng mga kabataang nanghihimok ng kamalayan laban sa pang-aabuso.

Isa rito ang Grade 7 student si Humphrey, na nagsusulong ng adhikain kontra child abuse.

Ayon kay KEOFI director Susan Biteng, kapansin-pansin umano ang mataas na bilang ng mga nabibiktima ng pang-aabuso sa lugar.

"Mababa ang pagtingin sa bata at kababaihan. Object, walang nararamdaman at hindi naaapektuhan. Parang pag-aari siya ng lalaki at lipunan. Isa sa bakit mataas ang incidents ng abuse."

Nagkaroon din ng forum para maturuan ang mga kabataan sa kanilang mga karapatan at maiwasang maging biktima ng pang-aabuso.

--Ulat ni Lady Vicencio, ABS-CBN News

Bisitahin ang Patrol.PH para sa iba pang mga balita.