Naantalang pagkuha ng birth certificate nais gawing libre

ABS-CBN News

Posted at Nov 20 2019 08:34 PM | Updated as of Nov 23 2019 08:30 PM

Watch more in iWant or TFC.tv

MAYNILA — Isinusulong ngayon sa Kongreso ang panukalang gawing libre ang pagkuha ng delayed registration of birth. 

Lumalabas kasi sa datos ng Philippine Statistics Authority (PSA) na nasa higit 7 milyong Pilipino ang hindi rehistrado sa kanilang ahensiya, karamihan ay mga bata. 

"Pag nag-aral ang bata, birth certificate ang kailangan... Pag naghanap ng trabaho, kailangan din ng birth certificate para ma-enjoy ang social services ng gobyerno, at siyempre national identity," paliwanag ni Fred Sollesta, assistant national statistician ng PSA. 

Dapat kasi sa loob ng 30 araw mula nang ipinanganak, iparerehistro agad ng magulang ang sanggol sa Civil Registrar Office ng munisipyo. 

Pero ilan sa mga dahilan ng hindi pagpaparehistro ay kahirapan o kaya'y iyong mga nanay ay hindi sa ospital nanganak.

Ang problema, ayon sa ilang mambabatas, marami sa mga walang birth certificate ay hindi na kumukuha dahil may bayad ito. 

Aabot daw sa higit P1,000 ang gagastusin para sa delayed birth registration. 

Ito ang dahilan kaya isinusulong nila sa Kamara ang panukalang gawing libre ang ng naturang dokumento. 

"Hindi dapat nagdudusa ang mga mahihirap dahil wala silang pera," ani Agusan del Norte Rep. Lawrence Fortun.

Sa ngayon, pinag-aaralan na sa committee level ang panukala. 

Umaasa si Fortun na maisabatas ito para lahat ng Pilipino ay magiging rehistrado at makatanggap ng tamang benepisyo mula sa pamahalaan. 

—Ulat ni Apples Jalandoni, ABS-CBN News

Bisitahin ang Patrol.PH para sa iba pang mga balita.