Higit 100 ektarya ng pananim sa Ilocos Norte, nasira dahil sa ulan

ABS-CBN News

Posted at Nov 12 2019 12:35 AM

Nasalanta ng ilang araw na pag-ulan ang mga pananim na ito sa Badoc, Ilocos Norte. Dianne Dy, ABS-CBN News

ILOCOS NORTE—Nasira ang nasa 106 ektarya ng pananim sa bayan ng Badoc, Ilocos Norte dahil sa ilang araw na pag-ulan.

Kabilang dito ang mga pananim ng pakwan, sibuyas, mais, bawang at kamatis, base sa tala ng Badoc agriculture office.

"Dahil sa matinding ulan sa mga nagdaang araw, nabulok 'yong mga pananim," ani agriculturist Leonora Escarda.

Paliwanag ni Escarda, ang mga ganitong klaseng pananim ay madaling masira kapag sobra ang tubig.

"Hindi sila puwedeng maka-survive sa matinding ulan at hindi namin inaasahan sa ganitong pangyayari," aniya.

Kabilang sa mga apektadong magsasaka ay si Gilbert Agabin na nalugi ng higit P50,000.

"Hindi namin inasahan na uulan ng sobra," aniya.

Hihingi ng tulong sa lungsod si Agabin at iba pang magsasaka para makapagsimula muli.

"Wala kaming maitanim kung hindi magbibigay ang gobyerno. Hihingi kami sa munisipyo kung meron para makatanim kami ngayong linggo," aniya.

Pinag-aaralan naman ng lungsod kung muli silang magbibigay ng binhi sa mga magsasaka. Karamihan sa mga nasira ay mga itinanim na binhi na naunang ibinigay ng lokal na pamahalaan.—Ulat ni Dianne Dy, ABS-CBN News

Bisitahin ang Patrol.PH para sa iba pang mga balita.