4 barangay sa Dipolog City, nalubog sa baha

Maria Cecilia Butardo, ABS-CBN News

Posted at Nov 06 2018 01:38 PM

Binaha ang apat na barangay sa Dipolog City dahil sa patuloy na pag-uulan dulot ng umiiral intertropical convergence zone o ITCZ. Larawan mula kay Zorayda Mustaril

DIPOLOG CITY – Apat na barangay sa lungsod na ito ang nasalanta ng pagbaha dahil sa walang tigil na pag-uulan.

Apektado ng pagbaha ang 89 pamilya sa mga barangay ng Sta. Isabel, Turno at Lugdungan. Wala pang detalye ang City Disaster Risk Reduction and Management Office (CDRRMO) kung ilang pamilya ang apektado rin ng pagbaha sa Barangay Sta. Filomena.

Sa Barangay Turno, tinatayang nasa 45-pulgada ang lalim ng baha habang 26-pulgada naman sa Lugdungan, at 10 hanggang 13 pulgada sa Sta Isabel.

Sa kasalukuyan, nasa evacuation centers na ang mga apektadong residente.

Ang mga binahang barangay ay kabilang sa low-lying areas at malapit sa Dipolog River na ngayo'y nasa red level na, hudyat ito ng preemptive evacuation.

Simula pa noong Sabado ay nararanasan sa lungsod ang pag-ulan na sanhi ng Intertropical Convergence Zone o ITCZ.

Wala nang pag-ulan pero makulimlim pa rin sa lungsod.
 

Bisitahin ang Patrol.PH para sa iba pang mga balita.