Patay sa mga Benguet landslide, lumobo sa 75

ABS-CBN News

Posted at Sep 24 2018 03:17 PM | Updated as of Sep 24 2018 03:37 PM

Watch more in iWant or TFC.tv

Lumobo na sa 75 ang kumpirmadong patay habang 35 pa ang nawawala sa mga landslide sa Benguet dahil sa bagyong Ompong. Binalaan naman ang mga residente sa panibagong bagyong nakaamba. 

Sa mga ito, 70 ay mula sa bayan ng Itogon, Benguet, ayon kay Benguet police provincial director Superintendent Lyndon Mencio. 

Limampu't isa rito ay mga bangkay na nakuha nitong Lunes sa Barangay Ucab, Itogon, kung saan may 17 katao pa ang nawawala.

Ayon kay search rescue and retrieval cluster head Brigade General Leopoldo Imbang Jr., 200 metro pang lawak ng putik ang kailangang tanggalin para mahanap ang iba pang nawawalang residente. 

Binisita naman ng mga lokal na opisyal ng Itogon at mga pulis ang mga residente para bigyang-babala ang mga ito sa paparating na bagyong Paeng.

Iniutos na rin ni Itogon Mayor Victor Palangdan ang preemptive evacuation sa lugar lalo’t idineklarang danger zone ang Barangay Ucab. 

-- May ulat ni Dennis Datu, ABS-CBN News

Bisitahin ang Patrol.PH para sa iba pang mga balita.