Misis pinatay ng mister dahil sa selos bago nagsaksak sa sarili

ABS-CBN News

Posted at Sep 20 2019 04:45 AM | Updated as of Sep 20 2019 06:14 AM

Mark Gabriel Salanga, ABS-CBN News

NEGROS OCCIDENTAL—Patay ang isang misis matapos pagsasaksakin ng kaniyang mister sa loob ng kanilang bahay sa Victorias, Negros Occidental nitong Huwebes.

Patay rin ang suspek matapos nitong saksakin ang sarili.

Base sa imbestigasyon ng Victorias police, narinig ng mga kapitbahay na humihingi ng tulong ang 40 anyos na biktima alas-10 ng umaga.

Nang puntahan ng isang kapitbahay, nadatnan nito na may tama na ng saksak ang biktima. 

Nagbanta naman ang suspek na huwag makialam sa kanila kaya agad siyang humingi ng tulong sa iba.

Ilang minuto ang makalipas, nadatnan nalang ng mga kapitbahay na wala nang buhay ang biktima dahil sa tinamong 13 saksak sa katawan.

Sinaksak naman ng suspek ang kaniyang tiyan. Dinala pa siya sa ospital, pero binawian ng buhay Huwebes ng gabi.

Ayon sa mga pulis, nagtatrabaho sa isang night club ang biktima habang magsasaka ang suspek.

Selos ang nakikitang motibo ng pulisya sa insidente dahil nagdududa ang suspek na may ibang lalaki ang biktima.

Dalawang araw nang hindi nakauwi sa kanilang bahay ang suspek matapos makakuha ng barangay protection order ang biktima. 

Hinintay pa umano ng suspek na pumasok sa paaralan ang kanilang mga anak bago gawin ang krimen.

Ayon sa panganay ng mag-asawa, matagal na umanong nag-aaway ang kanilang mga magulang.—Ulat ni Mark Gabriel Salanga, ABS-CBN News

Bisitahin ang Patrol.PH para sa iba pang mga balita.