2 tagapunerarya 'nang-hostage' ng bangkay kapalit ng P360,000

ABS-CBN News

Posted at Sep 05 2019 07:00 PM | Updated as of Sep 06 2019 10:54 PM

Watch more in iWant or TFC.tv

Dalawang empleyado ng punerarya ang nahuli sa umano'y paghingi ng P360,000 para mailabas ang isang bangkay sa Maynila.

Sa bisa ng entrapment operation ng Mayor's Special Reaction Team ng lungsod, naaresto ang dalawang empleyado matapos tanggapin ang marked money para ma-release umano ang bangkay ng isang Marvin Ologenio, na namatay matapos malunod.

Ayon sa kaanak ng namatay, Setyembre 3 pa dinala ang bangkay ni Ologenio sa punerarya at kung ano-ano raw ang sinisingil sa kanila.

Ayon pa sa pulisya, tila "na-hostage" ang bangkay ng biktima.

Aabot sa P360,000 ang siningil ng punerarya sa pamilya ni Ologenio, bukod pa sa halaga ng kaniyang kabaong.

Sa quotation na binigay sa kanila ng punerarya, umaabot na ng P200,000 ang halaga ng pagpapa-restore at pagre-reconstruct ng bangkay.

Pero nang masilip ng pamilya ang bangkay ni Ologenio, hindi na nila ito makilala at nag-iba na umano ang hitsura nito.

Patuloy na iniimbestigahan ng mga awtoridad ang insidente.

-- Ulat ni Zyann Ambrosio, ABS-CBN News

Bisitahin ang Patrol.PH para sa iba pang mga balita.