Misis, ginilitan at pinagsasaksak ng asawa dahil sa selos

Kevin Dinglasan, ABS-CBN News

Posted at Sep 04 2018 09:33 AM

Sa loob ng bahay ng mga magulang ng biktima pinatay ni Fernando Carabido ang asawa dahil umano sa selos. Larawan mula sa Tayabas City Police

TAYABAS, Quezon – Patay ang isang babae nang pagsasaksakin at gilitan pa sa leeg ng kaniyang asawa dahil umano sa selos sa lungsod na ito, Lunes ng umaga.

Patay na nang abutan ng kaniyang hipag ang biktimang nakilalang si Rechell Carabido.

Ayon sa kaniyang hipag, Lunes ng umaga nang dumating sa bahay ng mga magulang ng biktima sa Barangay Tongko ang asawa nitong si Fernando. May bitbit daw itong palanggana sa likod at hinahanap ang asawa na may 4 na araw nang humiwalay sa kaniya.

"Pagkasilip po niya sa bintana, maya-maya po'y pumasok na siya. Wala ho akong narinig na ingay, kung ano man pong kaluskos. Pagpasok ko po nakasalubong ko pa po siya na duguan na po tapos hawak na ho yung kutsilyo," sabi ng hipag ng biktima.

Sinubukan pa raw niyang pigilan ang suspek pero agad ding nakatakas bitbit ang kutsilyo.

Ilang oras matapos ang krimen, sumuko sa awtoridad ang suspek na nangumpisal pa umano sa isang simbahan sa Lucena City.

Inamin ng suspek na pinagsasaksak nya ang asawa dahil sa ilang beses na niya itong nahuhuling nanlalalaki. Itinanggi naman ng ina ng biktima ang paratang.

“Wala namang katotohanan. Hindi ‘yun dahilan para patayin mo ‘yan. Ang anak ko po'y may polio may kapansanan pa ‘yan. Pagbayaran niya ang ginawa niya sa aking anak kahit siya'y nakulong kulang pa ‘yan," sabi ng ina ng biktima na si Rosalina Datoon.

Mahaharap sa kasong parricide ang nakakulong na suspek.

Bisitahin ang Patrol.PH para sa iba pang mga balita.