Restaurant sa Negros Occ. na binisita ng pasyenteng namatay sa COVID-19, pansamantalang isinara

Martian Muyco, ABS-CBN News

Posted at Aug 11 2020 04:53 PM

Pansamantalang isinara ang isang restaurant sa La Castellana, Negros Occidental matapos bisitahin ng COVID-19 patient na kinalaunan ay namatay.

Nagsasagawa ang lokal na pamahalaan ng La Castellana ng contact tracing sa lahat ng posibleng nakasalamuha sa restaurant ng 60-anyos na babaeng nagpositibo sa sakit.

Ayon kay La Castellana Mayor Rhumyla Nicor-Mangilimutan, nagkape noong Agosto 2 sa naturang restaurant ang namatay na COVID-19 patient na taga-La Carlota City.

Pinaghahanap nila ang mga nakasabay nito na kumain din sa restaurant.

Isasailalim naman sa swab test ang 8 staff ng restaurant.

Para naman mas mapaigting ang kampanya kontra COVID-19, naglabas ng Executive Order ang alkalde para ma-regulate ang mga bumibisita sa kanilang bayan.

Hihingan rin nila ng medical certificate ang mga tutungo sa La Castellana, at maglalagay ng checkpoints para masiguro na nakasuot ng face mask at nag-oobserve ng physical distancing ang mga residente.