Barangay sa La Union nag-mass testing para masawata ang pandemya

ABS-CBN News

Posted at Aug 06 2020 04:26 PM

SAN FERNANDO CITY, La Union — Magkakasunod na COVID-19 cases ang natukoy sa isang purok dito matapos magsagawa ng mass testing ang mga awtoridad. 

Matapos makapagtala ng COVID-19 positive patient, nagsagawa na ng mass testing ang pamahalaang lungsod ng San Fernando City sa Barangay San Agustin. 

Dahil sa mass testing, 7 COVID-19 cases ang natukoy agad noong Agosto 4, na lahat ay mula sa Purok 2A.

Ang 2 ay may exposure sa COVID-19 case habang ang 5 naman ay inaalam pa kung paano nahawa. 

Sa sumunod na araw, karagdagang 2 kaso ang naitala sa parehong purok.

Isinailalim na ang barangay sa total lockdown kaya't higit 700 pamilya ang apektado, pero aabutan naman sila ng relief goods.

Huling linggo ng Hulyo nang aprubahan ng IATF ang hiling na muling isailalim sa enhanced community quarantine ang buong San Fernando City dahil sa biglang pagtaas ng kaso.

Pero noong Agosto 1 ay balik na ang lungsod sa modified general community quarantine.

—Ulat ni Michelle Soriano, ABS-CBN News

Bisitahin ang Patrol.PH para sa iba pang mga balita.