Pilipinas may higit 112,000 kaso na ng COVID-19

ABS-CBN News

Posted at Aug 04 2020 07:43 PM

MAYNILA —Pumalo sa pinakamataas na bilang ang nakumpirmang kaso ng COVID-19 sa Pilipinas sa loob nang isang araw.

Sa pinakahuling tala ng Department of Health (DOH) nitong Martes, sumipa sa 6,352 ang bagong kaso ng COVID-19 dahilan para umakyat na sa 112,593 ang kabuuang bilang nito sa Pilipinas. 

Ang 44,429 dito ay itinuturing na active cases. 
    
Sa mga bagong naitalang kaso, 3,139 ang mula sa Metro Manila, 592 sa Laguna, 550 sa Cavite, 277 sa Rizal, habang 261 sa Cebu. 
    
Labing isa naman ang nadagdag sa bilang ng mga nasawi para sa kabuuang 2,115. 
    
Umakyat naman sa 66,049 ang gumagaling sa sakit matapos madagdag sa bilang ang 240 na bagong recoveries ngayong Martes.

Samantala, nasa halos 18 milyon na ang may kumpirmadong kaso ng COVID-19 sa buong mundo, habang nasa higit 680,000 na ang namamatay, base sa pinakahuling tala ng World Health Organization.

Bisitahin ang Patrol.PH para sa iba pang mga balita.