TINGNAN: Mug shot ng magkapatid na Parojinog

ABS-CBN News

Posted at Aug 01 2017 06:56 PM

Sumailalim na sa booking procedure sina Ozamiz City Vice Mayor Nova Parojinog at kapatid na si Reynaldo Parojinog Jr sa Camp Crame nitong Martes, Agosto 1.

Inaakusahan ang dalawa sa paglabag sa Comprehensive Dangerous Drugs Act kasunod ng madugong raid ng awtoridad sa kanilang bahay na nagresulta sa pagkamatay ng amang si Ozamiz Mayor Reynaldo "Aldong" Parojinog at 14 na iba pa.

Narekober ang mga hinihinalang shabu at ilang armas at pampasabog gaya ng M-16 rifles at hand grenades sa sunod-sunod na raid sa San Roque Lawis, Ozamiz City noong Linggo, Hulyo 30.

Ayon sa abogado ng magkapatid na si Atty. Ferdinand Topacio, igigiit niya ang pagpapalaya sa kanyang mga kliyente dahil na-detine ang bise alkalde at kanyang kapatid nang mahigit 36 na oras simula nang maaresto sila ng alas-6 ng umaga noong Linggo.

Dagdag ni Topacio, maaaring managot sa Article 125 ng Revised Penal Code ang mga nang-arestong pulis dahil sa tagal sa paghahatid ng 'proper judicial authorities' sa mga nakadetine.

--May report mula kina Maan Macapagal at Mike Navallo, ABS-CBN News

Bisitahin ang Patrol.PH para sa iba pang mga balita.