Konsehal, dating alkalde, 2 iba pa patay sa pamamaril sa Negros Oriental

Martian Muyco, ABS-CBN News

Posted at Jul 27 2019 10:55 AM | Updated as of Jul 27 2019 07:23 PM

Watch more in iWant or TFC.tv

CANLAON, Negros Oriental - Apat ang patay kabilang ang isang konsehal at isang dating alkalde sa magkakahiwalay na insidente ng pamamaril dito sa probinsya, Sabado.

Pasado alas-12 nang madaling araw, halos magkasabay na sinalakay at pinagbabaril sa kani-kanilang bahay sa Canlaon City sina Konsehal Bobby Jalandoni at Barangay Panubugan chair Ernesto Posadas.

Pasado alas-2 naman ng umaga, sinalakay din sa Ayungon ang bahay ng dating alkalde ng bayan na si Edsel Enardecido at ang kaniyang kamag-anak na si Leo Enardecido.

Sa loob ng isang linggo, 16 na lahat ang napatay sa Negros Oriental dahil sa mga insidente ng pamamaril, ayon sa mga awtoridad.

Sa inisyal na report ng mga pulis, puro mga armadong grupo ang sumalakay at bumaril sa mga biktima.

Patuloy na nasa full alert status ang kapulisan dito sa probinsya dahil sa mga pangyayari.