Sunog sumiklab sa bahagi ng ginagawang condo sa QC

ABS-CBN News

Posted at Jul 20 2020 06:02 PM | Updated as of Jul 20 2020 10:47 PM

Sa inisyal na impormasyon, wala namang nakatira pa sa nasabing condominium. Screengrab

MAYNILA (UPDATE)— Sumiklab ang sunog sa isang construction site sa Quezon City nitong Lunes ng hapon.

Nangyari ang sunog sa ginagawang tower 2 building ng Sun Trust Condominium sa E. Rodriguez. Sa report mula sa Bureau of Fire Protection, nagsimula ang sunong alas-2:30 ng hapon at umabot sa ikalawang alarma.

Sa inisyal na impormasyon, walang nakatira sa nasabing condominium.

Nagsimula ang sunog sa bodega sa ikatlong palapag, na na nagsisilbing tambakan ng gamit at iba pang materyales sa construction, ayon kay Quezon City Fire Senior Inspector Lyndon Yap.

Bandang 4:50 ng hapon ay idineklara nang under control ang apoy. Tuluyang naapula ang sunog alas 6:15 ng gabi.

Umabot sa 30 ang na-rescue na trabahador sa gusali. Walang nasugatan sa mga ito, bukod sa 43-anyos na si Alma de Dios na nagtamo ng gasgas sa tuhod.

Sa taya ng BFP, aabot sa P1.5 million ang halaga ng ari-ariang tinupok ng apoy. Patuloy na iniimbestigahan ang sanhi ng sunog.--May ulat ni Jeffrey Hernaez, ABS-CBN News

Bisitahin ang Patrol.PH para sa iba pang mga balita.