TINGNAN: Bahagi ng Manila Bay tambak ng basura matapos umulan

ABS-CBN News

Posted at Jul 17 2019 11:24 AM

Kasunod ng pagbuhos ng ulan magdamag, tambak ulit ng basura ang ilang parte ng Manila Bay sa Maynila nitong Miyerkoles.

Kalimitang naiipon ang sangkaterbang basura sa gilid ng US Embassy na sumasabay sa hampas ng alon sa breakwater ng Manila Bay.

Karamihan sa mga ito ay mga kawayan at kahoy na sinasabing inaanod lamang sa baybayin mula sa ibang mga lugar.

Sinimulan na ng mga tauhan ng Department of Public Services (DPS) ng lokal na pamahalaan ang paghahakot ng mga basura mula sa dagat.

Sako-sakong basura din ang nahakot na mula sa dagat at pinagsama-sama sa Baywalk.

Ayon sa mga tauhan ng DPS, posibleng matatagalan pa bago tuluyang malinis ang basura dito na hindi malayong matambakan ulit ng basura kapag nagkaroon muli ng malakas na ulan dahil narin sa habagat at bagyo.

-- Ulat ni Johnson Manabat, ABS-CBN News

Bisitahin ang Patrol.PH para sa iba pang mga balita.