18 sangkot sa investment scam sa Caraga, kinasuhan na

ABS-CBN News

Posted at Jul 01 2019 11:06 AM

MAYNILA - Kinasuhan na ang 18 indibidwal na sangkot sa rice trading investment scam sa Caraga region at iba pang bahagi ng Mindanao, ayon sa pulisya nitong Lunes.

Nangako ang FRX Rice Trading Investment na magiging triple ang perang pinuhunan ng mga miyembro nito, ayon kay Police Major Gen. Amador Corpus, hepe ng PNP Criminal Investigation and Detection Group.

Nahaharap ang 3 founder ng kompanya at 15 iba pa sa kasong paglabag sa Securities Regulation Code.

Noong nakaraang linggo, nakumpiska ng awtoridad ang P23 milyong cash na nakasilid sa mga plastik na kahon, mga counting machine, at log book sa safehouse ng kompanya sa Nasipit, Agusan del Sur.

Walang naaresto sa nasabing safe house dahil nakatunog umano ang mga empleyado nito.

-- Ulat ni Zhander Cayabyab, ABS-CBN News

Bisitahin ang Patrol.PH para sa iba pang mga balita.