Umano'y online scammer huli sa entrapment sa QC

ABS-CBN News

Posted at Apr 27 2019 04:39 PM | Updated as of Apr 27 2019 08:49 PM

Watch more in iWant or TFC.tv

MAYNILA — Arestado sa entrapment operation noong Biyernes ang isang lalaki na miyembro umano ng online scamming group na tumatangay ng pera mula sa kanilang buyers.

Kinilala ang suspek na si alyas "Bogart" na nanloko umano sa isang online customer na bibili sana ng solar water heater.

Ayon kay Police Lt. Col. Reyson Bagain, modus ng grupo na mag-post sa online selling site para makahanap ng tatargetin.

Kapag naikasa na ang transaksiyon at nakapag-downpayment na ang kostumer, hindi na daw magpaparamdam ang seller.

"After kayo makipag-deal sa contact, you are advised to deposit para sa product. After ma-deposit ang amount, di na sila makokontak," ani Bagain.

Iba-iba rin umano ang nakakausap ng kostumer para hindi agad sila matunton.

"Kapag tinawagan mo sa site, may isang sasagot ipapa-deposit ang pera sa bank account na di niya kakilala... May layering para di mo sila ma-trace," ani Bagain.

Natunton si Bogart nang makuha ng pulisya ang pagkakakilanlan ng may-ari ng bank account.

Tumanggi ang suspek sa krimen at sinabing nagkataon lang na hindi natuloy ang installation ng naturang kliyente.

"Marami na kaming na-install na water heater," katuwiran ni Bogart.

Nahaharap si Bogart sa kasong estafa habang pinaghahanap pa ang kaniyang mga kasamahan.

-- Ulat ni Ernie Manio, ABS-CBN News

Bisitahin ang Patrol.PH para sa iba pang mga balita.