'Bigas kapalit ng plastik': Iba't ibang pakulo, inilunsad para sa Earth Day

ABS-CBN News

Posted at Apr 21 2018 07:32 PM | Updated as of Apr 21 2018 07:58 PM

Watch more in iWant or TFC.tv

Sa paunang selebrasyon ng Earth Day, iba't-ibang paraan ang isinagawa sa Cavite at Las Piñas para mapangalagaan ang kalikasan.

Ibinida sa Cavite ang proyektong isang kilong bigas kapalit ng isang kilong plastik na basura.

Isa sa mga sumali sa proyekto si Glenda Reliora na nakaipon ng tatlong sako ng plastic na basura dahil sa pagpupulot ng mga kalat sa Rosario, Cavite.

Umabot sa anim na kilong bigas ang naiuwi ni Reliora dahil sa kaniyang naipon na basura.

Ayon kay Nonong Ricafrente, vice mayor ng Rosario, Cavite, nais nilang matuto ang mga tao na mag-segregate o maghiwa-hiwalay ng basura.

Dadalhin sa recycling plant ang mga makokoletang basura para gawing mga upuan.

Sa Las Piñas naman, ibinida ang mga produktong nalikha galing sa plastik na basura.

Nakolekta ang mga basura sa Las Piñas-Parañaque Wetland Park sa tulong ng Greenpeace Philippines at Villar Sipag Foundation.

Ikinalungkot naman ni Senator Cynthia Villar, chairperson ng Senate Committee on Environment and Natural Resources, na pangatlo ang bansa sa China at Indonesia sa walang habas na pagkakalat ng plastic materials.

Gugunitain ang Earth Day sa Abril 22.

--Ulat ni Jeck Batallones, ABS-CBN News

Bisitahin ang Patrol.PH para sa iba pang mga balita.