3 miyembro ng pamilya nalunod sa CamSur

Rizza Mostar, ABS-CBN News

Posted at Mar 27 2019 03:52 PM

Sabay-sabay na pinaglalamayan ngayon ang tatlong miyembro ng pamilya Quiñones na umano'y nalunod matapos na magkaaberya ang sinakyang bangka. Rizza Mostar, ABS-CBN News

TINAMBAC, Camarines Sur – Tatlong kasapi ng isang pamilya ang sabay-sabay na pinaglalamayan matapos na malunod nang magkaaberya ang sinakyang bangka sa dagat Sabado ng gabi.

Unang nakitang palutang-lutang sa karagatang sakop ng Barangay Buenavista ang 10-taong gulang na si Lovely Quiñones.

Sunod na natagpuan naman ang bangkay ng kaniyang mga magulang na sina Rolando at Belen na napuluputan pa ng pisi. 

Kuwento ng panganay na si Yolly, sumama ang bunsong kapatid na si Lovely sa kaniyang mga magulang para makiisa sa pabasa ng lola sa Barangay Buenavista.

Umalis ang tatlo mula sa Barangay Salvacion Sabado ng gabi para sa isang oras sanang biyahe sa dagat.

Sa imbestigasyon ng pulisya, posibleng tumama sa matigas na bagay ang sinakyan nilang bangka.

Pero naniniwala ang pamilya ng mga namatay na hindi simpleng pagkalunod ang nangyari.

Sira ang gilid ng de-makinang bangka ng pamilya kaya posible raw na nabangga ito ng katig at lumubog.

Bisitahin ang Patrol.PH para sa iba pang mga balita.