Sekyu timbog sa pagnanakaw ng condom sa convenience store

ABS-CBN News

Posted at Feb 24 2019 03:06 PM

Nasapul sa CCTV ang pagnanakaw ng isang security guard sa isang kahon ng condom sa pinagtatrabahuhan niyang convenience store sa Davao City. Video mula sa Tugbok Police Station

DAVAO CITY — Naaresto noong gabi ng Biyernes ang isang security guard matapos umanong magnakaw ng isang kahon ng condom sa pinagtatrabahuhan niyang convenience store sa Barangay Mintal sa lungosd na ito.

Sa kuha ng CCTV ng convenience store, mapapanood na tila nagmasid muna ang 21 anyos na guwardiya bago biglang kinuha ang kahon ng condom sa counter at itinago sa kaniyang bulsa.

Ipinahuli ng manager ng convenience store ang guwardiya matapos mapunang may nawawalang produkto habang nagi-inventory, ayon kay Chief Inspector Ricky Obenza.

"Ni-review nila sa CCTV at doon nakita na pasimpleng kinuha," ani Obenza.

Inamin naman ng guwardiya ang pagkuha sa produkto pero ipinaliwanag din niyang na-curious lang daw siya rito.

Kakasuhan ang guwardiya sa kasong qualified theft.

-- Ulat nina Chrislen Bulosan at Cheche Diabordo, ABS-CBN News

Bisitahin ang Patrol.PH para sa iba pang mga balita.