Pulis arestado sa Ilocos Norte dahil sa 'indiscriminate firing'

Kim Lorenzo, ABS-CBN News

Posted at Feb 19 2018 04:10 PM

Kuha ng PNP-Dingras, I.N

Sinampahan ng kasong alarm and scandal ang isang pulis matapos umanong magpaputok ng baril sa Dingras, Ilocos Norte noong Sabado.

Ayon kay Senior Supt. Jose Melencio Nartatez Jr., hepe ng probinsya, naabutan ng mga pulis sa sementeryo ang grupo ni PO2 Ganee Martin matapos silang makakuha ng impormasyon na may sunod-sunod na putok ng baril na narinig ang mga residente.

“He was arrested in a cemetery in Dingras wherein he was there to commemorate the death of his in-law Nathaniel Taylan II who was gunned down,” ani Nartatez.

Ayon sa pulisya, napangasawa ni PO2 Martin ang pinsan ni Taylan, ngunit mahigpit na ipinagbabawal ang pagpapaputok ng baril.

“Hindi pwede ito,” ani Nartatez.

Kinumpiska ng pulis ang gamit na service firearm ni PO2 Martin na cal. 9mm, patch at maging ang ID nito.

Narekober sa semeteryo ang apat na kapsula ng cal. 9mm.

Sumailalim na sa paraffin test si Martin at 4 pang kasama nito.

Maliban sa kasong kriminal pinag-aaralan na ang kasong adminsitratibo laban sa mga ito.

Tumangging magbigay ng komento si Martin.

Ayon kay Nartatez hindi niya papalampasin ang mga ganitong pangyayari lalo’t kainitan ngayon ng internal cleansing sa mga iskalawag na pulis.