Binatilyo, nasabugan ng pinulot na paputok

Anjo Bagaoisan, ABS-CBN News

Posted at Jan 01 2020 02:42 PM

MAYNILA - Nasugatan sa kanang kamay at sa mga binti ang 13-taong gulang na lalaki matapos masabugan ng hindi pa matukoy na uri ng paputok sa Tondo.

Mula sa ospital sa Tondo, inilipat ang bata sa Jose Reyes Memorial Medical Center para operahan. Kuwento ng kaniyang lola, nalaman na lang niyang isinugod sa ospital ang apo pagkagising ng umaga. 

Kasama ng binatilyo ang mga kaibigan niya nang masabugan siya. 

Pumulot umano ng paputok ang apo sa basketball court malapit sa bahay nila pero sinindihan ito ng mga kaibigan habang hawak pa niya. 

"Yung kasamang nagsindi, tinamaan din sa mukha, kaya dalawa silang pumunta sa Tondo," sabi niya.

Na-discharge naman agad ang kaibigan ng biktima na nadaplisan sa mukha.

"Paalala ko talaga sa kaniya, kagabi pa po, 'Wag kang hahawak ng paputok. Hindi nga siya humawak kagabi, nagdampot naman siya ng umaga,” sabi ng kaniyang lola. 

Posibleng umabot ng 3 hanggang 4 na oras ang operasyon sa bata. 

Ayon kay Dr. Bernard Adajar, Chief Resident ng orthopedic section, susubukang i-reconstruct o ibalik sa ayos ang kamay ng bata. 

"Ita-try namin i-reconstruct pero kung mukhang hindi salvageable, we will opt to do amputation, pero so far mukhang may pag-asa. ... So it a-try pa rin namin siyang buuiin, gawing functional kasi bata pa," pahayag ng doktor.

Nauna nang pinutulan ng kamay ang isang lalaki na isinugod sa JRRMMC bago mag hatinggabi. 

Ayon sa doktor, isa itong 52-anyos na tanod sa Caloocan na nagtanggal ng mitsa ng kinumpiskang paputok na "Goodbye Philippines" kaya nasabugan. 

Nalaman ng mga doktor mula sa pasyente na nagkumpiska ang mga pulis ng mga bawal na paputok sa kanilang lugar. 

Nahatak umano ng tanod ang mitsa ng paputok at bigla itong sumabog kahit hindi nakasindi.

Sa tala ng ospital, nasa 29 pa rin ang bilang ng firecracker victims na kanilang ginamot mula Disyembre 21, 2019.

Pinakabata sa mga ito ay isang taong gulang lamang.
Hindi isasama sa bilang ang binatilyo dahil nakatala na ito sa ibang ospital.

Bisitahin ang Patrol.PH para sa iba pang mga balita.