Bakit may mga taong nagiging mainitin ang ulo kapag naipit sa trapiko?

ABS-CBN News

Posted at Dec 15 2019 03:02 PM

May mga pagkakataong umiinit ang ulo ng isang tao kapag naipit siya sa mabigat na daloy ng trapiko, na nagiging delikado kapag ibinuntong niya sa iba.

Ayon sa psychiatrist na si Joan Rifareal, isa sa mga salik kung bakit nagkakaroon ng "road rage" o agresibong pag-uugali ang isang tao ay dahil sa personalidad nito.

May mga tao kasi umanong mabilis magalit kapag naaantala ang mga plano o iskedyul dahil sa mabagal na trapiko.

"Kung 'yong driver is very, halimbawa, madaling uminit ulo [or] very perfectionistic,' paliwanag ni Rifareal.

"'Yong dapat sa kanila ayos ang [schedule] nila tapos hindi puwedeng lumihis doon sa plan nila. Kaunting delay lang, nagiging iritable sila," aniya.

Ayon sa doktora, nakadepende na lang sa pananaw ng tao sa trapiko para maiwasang uminit ang ulo.

"Puwede naman na ang perception natin sa traffic is, 'Sige lang, habang nata-traffic ako, mayroon ako mga puwedeng gawin while stuck,'" ani Rifareal.

"'Yong iba mas naiinis sila kasi very anxious, baka ma-late," dagdag niya.

Bisitahin ang Patrol.PH para sa iba pang mga balita.