JC Santos, umamin na fan siya ni Bela Padilla

ABS-CBN News

Posted at Jul 31 2017 01:38 PM

MANILA -- Isang pangarap na natupad para kay JC Santos na makasama sa isang proyekto si Bela Padilla.

Sa "Magandang Buhay" nitong Lunes, inamin ni JC na tagahanga siya ng aktres.

"Gusto ko siyang makatrabaho kasi fan ako ni Bela. Napanood ko siya sa 'Camp Sawi.' Sabi ko gusto kong makatrabaho ito. So noong binigyan nila ako ng pagkakataon, achieved. So nag-enjoy ako ng sobra talaga," ani JC na leading man na ngayon ng aktres sa pelikulang "100 Tula Para Kay Stella."

"Sobrang wonderful ng taong ito. At saka ang daling katrabaho, sobrang mapagbigay niya, generous at ang bait, bait nito," dagdag ng aktor.

Para naman kay Bela, hanga siya sa pagiging propesyonal ni JC at sa galing nito sa pag-arte.

"Sobrang daling katrabaho kasi lagi siyang prepared. Pagdating sa scene, parang alam niya na ang gusyo niya. Ang sarap niyang katrabaho," ani Bela.

"First time namin na magkakilala sa movie na ito. So ang ganda nag-work siya sa material namin," ani Bela.

Hango sa totoong buhay ang "100 Tula Para Kay Stella" na kuwento ni Fidel na gumawa ng 100 tula para ipahayag ang damdamin niya kay Stella.

Ang "100 Tula Para Kay Stella" ay kalahok sa gaganaping Pista ng Pelikulang Pilipino na ipapalabas simula ngayong Agosto 16.

Bisitahin ang Patrol.PH para sa iba pang mga balita.